نسايب علي قد حالهم
انا ابني خاطب بقاله كده سنه هو مسافر يعني خطب وسافر وان شاء الله هينزل في شهر ٧ يتجوز ده لو البنت كويسه لانها عملت معايا موقف مش حلو خالص انا كان عيد ميلادها في شهر ١ اللي فات وده اول عيد ميلاد لها وهي معانا المهم ابني بعت لها موبايل ايفون هدية عيد ميلادها
وانا جبت لها خاتم دهب ب ٦والاف وكانت فرحانه اوي بالهدايا علشان هما على قد حالهم والحاجات ديه مش بتدخل عندهم او يعرفوها المهم قالتلي انها جايلي علشان عيد الام وده كان يوم الجمعه اللي فاتت تتخيلوا جابتلي ايه هدية عيد الأم؟؟
جايبلي سلسله متجيش ب الف جنيه والله العظيم ده حصل فعلا علشان متقولوش اني بكذب المهم قولتلها ايه ده يا حببتي ديه لو وقعت مني مش هلاقيها وانا مش بلبس حاجات خفيفه وصغيره كده بالرغم اني كانت لما بتيجي عندنا شافت ان موبايلي شاشته مشروخه
وكنت بقول اني مبقتش اشوف فيه يعني كانت المفروض تجبلي واحد جديد على الاقل حتى لو ب ٥ ولا ٦ الاف عادي كنت هقبله والله ومش هحرجها المهم هي اشتكت لابني وبتقوله مامتك مش عاوزه تقبل مني الهديه واحرجتني وانا حلفت اني مش هاخدها ولو طولت معايا في الكلام مش هدخلها هنا تاني
وهو زعلان مني دلوقتي وهي السبب وبفكر اتصل على ابوها اشتكي له واهزقها هي كمان لأن بجد مضايقه اوي من تصرفاتها ديه وحاسه ان الموضوع هيتفشكل
رغم ان ابني فرحان بيها وعاوزها بس هي دخلت بنا وعاوزه توقعه فينا من الأول امال لما تتحوزه هتخليه يعمل ايه فينا عاوزه رايكم اعمل ايه في الموقف ده واعديه ولا اتصل عليهم اهزقهم