شكل. ماتنسيش إنها ست متجوزة دلوقتي و عندها طفل
و كأنه تفوّه ما تاقت لمناقشته فيه، فسألته على الفور :
-صحيح قولّي يا مراد. انت و هي قضيتوا فترة متجوزين. ليه ماخلفتش منها ؟
هز كتفيه و جاوب ببساطة :
-الهانم طبعًا تربية قصور و مدللة جدًا. لما اتجوزنا أنا كنت حابب أوي نخلّف بسرعة. لكن هي رفضت عشان تحافظ على شكل جسمها. قالت لي بعد سنتين أو تلاتة ممكن نجيب أول طفل. بس طبعًا مع عشرتي ليها عرفت إنها مش هاتنفذ كلمة من وعدها
-بس هي خلّفت لما اتجوزت بعدك !
-و ده يثبت إنها ماحبتنيش ! .. قالها “مراد” بابتسامة متصالحة
لم يبدي أيّ إنزعاج من أفكاره التي يطرحها و التي صارت حقيقة منذ مدة للجميع :
-أيًّا كان مين إللي اتجوزته هالة البحيري ف هي حبته. مش عشان قبلت تخلّف منه بس. دي كمان اتنازلت عن حياة القصور و سافرت معاه يبنوا حياتهم سوا
رفعت “إيمان” حاجبها معلّقة بحدة :
-ده انت متابع أخبارها بقى. و عرفت إنها سافرت !!
عاودت الضحكة تتغلغل طبقات صوته العميقة و هو يرد عليها متفكهًا :
-و الله و لا متابع و لا حاجة. انا عرفت من عثمان لما جه يحضر فرحنا. لأنها هي كانت السبب إننا قاطعنا بعض أنا و هو ف قدملي ملخص عن أحوالها و إنه ما صدق خلص من مسؤوليتها لما جوّزها لأخو مراته. عثمان ندمان لحد إنهاردة إنه سابني اتجوزها. هي آه بنت عمه. لكن أنا و هو بالنسبة لبعض أخوات. و هو كرهها جدًا طول فترة خصامنا