-ليه ؟ عشان لسا بتحبها هي و مشاعرك لسا متلخبطة !
-لأ مش عشان كده !!! .. صاح بفجاجةٍ
كان كتفيه يرتعشان الآن من شدة الإنفعال، أصر على كلامه و هو يستطرد بغلظةٍ :
-أنا بحب إيمان. من و احنا عيال كنا بنحب بعض. جوازي من هالة كان جواز تقليدي. ماكنش مبني على أي مشاعر بنت كانت
مناسبة ليا ماديًا و اجتماعيًا اتجوزتها.. العلاقة كانت باردة. ماحبتنيش. و أنا كمان اكتشفت إن عمري ما حبيت غير إيمان !
هزت رأسها غير مصدقة، و قالت بلهجة أكثر لطفًا و هي تتقرب إليه :
-مراد يا حبيبي. أكيد ده مش حب.. بس لنفرض إنك بتحبها. و هي دلوقتي ست متجوزة. و قبلها أرملة و أم لطفلة.. دي حياة صعبة و مسؤولية تقيلة عليك. انت عندك استعداد تدخل في المشاكل دي كلها ؟ فكر في خالتك. أدهم. فكر فينا كلنا.. أنا مش فاهمة. انت عاوز تعمل إيه يعني أو طالب مني أساعدك إزاي !!؟
أغمض “مراد” عينيه مطلقًا زفرةً طويلة، ثم نظر لها ثانيةً و قال بجفاءٍ :
-و لا حاجة. مش عايز مساعدتك خلاص.. أنا هاعرف أتصرف كويس !
و أنتزع نفسه من بين يديها، حاولت استبقائه بشتّى الطرق، لكنه لم ينصت و غادر المنزل كله، لا يعرف وجهةٍ يذهب إليها …
*****
حانت ساعة العشاء.. “أدهم” يترأس المائدة، أمه تجلس على يمينه، و زوجته تجلس على شماله و صغارها يتراصون بجوارها
أما “إيمان” فجلست بجوار أمها، تضع طفلتها “لمى” بحضنها، تحاول طوال الوقت حبس الدموع بعينيها بينما تلهي نفسها باطعام الصغيرة، و لم تغفل للحظة نظرات “سلاف” لها، نظرات كلها لا تنم سوى عن الإحتقار و الإشمئزاز
لقد تعرّضت للآذى كثيرًا اليوم، تفتت فؤادها بشكلٍ مُهين، اليوم تعرّت و شعرت بتهديدٍ كاد يقتلها حقًا …