وتمر الايام وحسين لسه تعبان ومش قادر يكمل حكايه مارى وامورة بتابعه كويس اوى ولسه مش ناسيه موضوع مرات ابوها اللى بقت أمورة متاكده ان الست دى وحشه وبتخون ابوها ولازم أمورة تعرف الحكايه وتساعد ابوها
وتمر الايام ويستعيد حسين صحته ولكنه لسه حزين وحابس نفسه فى البيت وعلى طول بيقرأ جوابات مارى ومش حابب يكمل الحكايه لامورة ، اللى خلاص نجحت فى اول سنه فى كليه الطب وعندها شغف تعرف مارى رجعت مصر ولا اتجوزت ولا حصل ليها ايه
ومن وقت للتاني امورة بتفتكر زين وتحاول تعرف اخباره وقررت انها تسأل عنه نجوى بطريقه خبيثه متخليش نجوى تعرف اللى بينها وبين حسين
أمورة بتتصل بنجوى وتقول
اهلا يا نجوى طمنيني عليكى نجحتى السنه دى ولا عملتى ايه
نجوى
اهلا أموره بصراحه انا شايله مادتين ، وانتى عملتى ايه انا عارفه دراسه الطب صعبه اوى اياكى تكونى شايله زى حلاتى
أمورة
لا خالص ، الحمد لله انا نجحت وطالعه التانيه على الدفعه كمان الحمد لله