أموره الوقت عدى ، انا عارف ان الوقت حرامى وبيسرق اللحظات الحلوة مننا واحنا مع حبايبنا ، يلا نامى دلوقتى والصبح نكمل
ونامت أموره ولكنها جواها احساس جميل أن جدو سن طلع شاعر وفنان وعاشق ولهان ، وافتكرت احساسها ومشاعرها اللى مخبياها عن زين ، ولكنها فاقت لنفسها على تنبيهات حسين انها متكلمش زين وتقطع علاقتها بيه كمان ، وقالت كمان لنفسها وبتحاول تقنع عقلها ، ان زين زمانه انشغل عنها ولا حب غيرها ، لأنها مقتنعه ان البعيد عن العين بعيد عن القلب
وتانى يوم الصبح كان زين حافظ جدول امتحان أموره يمكن اكتر من أموره نفسها ، وكان مستنى يشوفها قدام الكليه ، وطبعا نجوى صاحبتها كمان كانت مستنيه أموره بس مش علشان تطمن عليها
نجوى لابسه لبس شيك اوى واول ما شافت اموره قالت
أموره فينك يا بنتى فاتك نص عمرك ، انا وزين قضينا كام يوم مع بعض زى العسل ، مش عاوزة اقولك بقى فسح ودلع ، اما زين ده يا بنتى طلع رومانتك مووووت وحاسه انه عاوز يقولى خبر حصرى قريب اوى ، وعلى فكرة انتى وحشتينى اوى