زين اتغير اوى وبقى ساكت طول الوقت ، ورفض انه حتى يرد على مكالمات امورة ولا يعرف هى عاوزة منه ايه ، زين لسه لابس دبله نجوى اللى بتحاول تعمل المستحيل علشان ترضيه وتكسب قلبه
نجوى بتكلم زين فى التليفون اللى اخيرا رد عليها بعد اكتر من عشر مرات اتصال
او ، زين معقول برضو بقالى كام يوم باتصل ومفيش منك رد هى دى الاجازة اللى انت نازلها علشانى
زين
اجازة نازلها علشانك ازاى يعنى ، الاجازة دى انا نازلها علشان ارتاح يومين وخلاص انا راجع تانى
نجوى
ايه انت مجنون ولا ايه ، راجع تانى من غير حتى ما اشوفك ولا تفسحنى
زين
معلش انا فعلا مليش نفس اروح فى اى مكان ، ياريت تسامحيني المرادي
نجوى بعصبيه زياده عن اللزوم
والله ، بقى المرة اللى فاتت نفس الكلام والمرة دى نفس الكلام ، اما انت مش عاوزنى ولا بتحبنى طلبت ايدى ليه ولا انت بقى خطبتنى علشان ترفع مستواك مش اكتر ، وتناسب ناس ولاد اصول تليق بحضره الظابط
زين اتعدل فى قعدته ورد عليها بصوت عالى