بقالي ساعه بحاول امسكها ومش عارفه وجاب سكينه ودبح الفرخه قدامي غمضت عيوني بسرعه وقولتله حرام عليك قالي ونبي ما تحرميش اللي حلله ربنا ويالا بقي هاتي مايه سخنه من جوه جيبت المايه السخنه وبقي يعلمني اعمل اي وانضف الفرخه ازاى واخيرا خلصنا طبعا هو كان بيعلمني اعمل اي في كل لحظه وحطينا الاكل واحنا بناكل قالي اي ده هتاكلي من الفرخه يانادره مش حرام قولتله بقولك ايه انا جعانه وبعدين
ماتحرمش اللي حلله ربنا ابتسم وقالي ماشي اقعدي .. وقعدنا ناكل سوا وبعدها بشويه نادي للراجل الاخرس ده ياكل معانا هو بيسمعنا كويس اوي وفاهمنا بس ما بيتكلمش قعد ياكل معانا وطريقه اكله كانت قذره كنت قرفانه منه جدا شويه وكنت حاسه اني عايزه استفرغ كان بيتكلم بأيديه بجد ..يع .. قومت وقولت الزين انا عايزه اكل لوحدي يازين قالي مافيش الكلام ده يا ناكل كلنا علي طبليه واحده يا تقومي من غير ما تاكلي وبعدين انا جعانه ولسه مخلصتش اكل بقالي يومين مأكلتش بقيت اكل معاهم غصب عني بس في الاخر معدتي اتغلبت عليا وروحت قومت علي الحمام بسرعه استفرغت زين جه ورايا وقالي للدرجه دي انتي فاكره نفسك من
طينه واحنا من طينه تانيه
قولتله انت بتعمل كده ليه لو عندك مشكله مع ابويا فهي معاه هو مش معايا أنا ارحمني بقي ارحمني .. وبعدها دخلت نمت
ومع اول خيط فجر
لاقيت صوابع أيديه علي وشي وبيقولي اصحي يانادره فوقي قولتله اي في ايه قالي يالا عشان نفطر قولتله دلوقتي يازين حرام عليك قالي والله الفجر إذن اصحي يالا لحد ما اتوضا واصلي عشان تخبزلنا فطير .. بقيت ابرطم بالكلام واقول بصوت واطي
(ايه كمان فطير ) قالي وهو مديني ضهره بتقولي حاجه يانادره قولتله ماقولتش انا قايمه اهوه وقومت وغسلت وشي وطلعت ولاقيته بيصلي هو والراجل اللي معاه وبقي يقول الله اكبر ..
حسيت بقشعره في جسمي من الكلمه دي وكمان من صوته وهو بيقرا قرأن كنت مبسوطه وفي نفس الوقت اول مره اشوف حد بيصلي واسمع القران من يوم ما اتولدت ..انا عمري ما شفت بابا بيصلي في يوم وسيبتهم ودخلت الحمام وانا طالعه زين قالي تعالي معايا امبارح كان الفراخ النهارده بقي لازم تحلبي الجاموسه وتعمللنا قشطه وجبنه قريش قولت يادي المصيبه بقي انا هعرف اعمل اللي بيقول عليه ده بصيتله من غير ما أنطق حرف واحد وقولتله اللي هتقولي عليه هعمله ودخلنا الزريبه سوا واول والرريحه كانت مقرفه بشكل مش طبيعي بقيت حاطه ايدي علي مناخيري وانا مش طايقه نفسي والبيبي بتاع الجاموسه موجود جنبها