سكتت نور وبصّت للكل ومتنكرش إن كلام أدهم مريّحها ومطمّنها فقالت بهدوء: هصلي استخارة واللي ربنا عاوزه هيكون
الكل مشي ونور صلّت استخارة وطلبت من ربنا يقرّبلها اللي فيه الخير ليها وافتكرت كلام البنات وأمير والحج عادل والحجّة فاطمة عن تصديقهم لأدهم وإنه فعلاً مشاعره تجاهها واضح ليهم إنها فعلاً صادقة ونامت
عدّى يومين وهي حاسة براحة وان مشاعرها تجاهه بتزيد وبتبقى أعمق فقالت لأمير يبلّغ الكل موافقتها، الكل فرِح لموافقتها
ونزلت هي واخواتها مع أدهم ونقّوا الشبكة وطلبت نور انهم يلبسوها في البيت عندهم وأدهم وافق
وجه يوم الخطوبة وكانت نور لابسة فستان سواريه كحلي وخمار بلون الفستان وحطّت ميك أب خفيف جدااا بزَن من البنات وأدهم كان لابس بدلة كحلي زي لون فستانها لما عرف لونه من البنات وده بسَطها جداً، أول ما شافها مقدرش يبعد عيونه
عنها وهي كانت مكسوفة جدااا من نظراته واتفاجئت إنه طلب إنهم يعملوا كتب الكتاب مع الشبكة من الحج عادل وأمير عشان يقدر يقرّبوا لبعض قبل ما يتم جوازهم بعد السنة ما تخلص زي ما اتفقوا وقدام فرحة أدهم والكل لقت نفسها قلبها موافق على قرارهم ووافقت وتم كتب الكتاب وسط فرحة الكل ولبسوا الشبكة واتصوروا كتير والفرحة مالية قلوبهم وخدها أدهم وخرجوا يتعشوا برة ومعاهم أمير وهدى وحازم وأميرة ومراد وضي وشهد روّحوا مع مامتهم مع ياسر وصّلهم وروّح
خرج الكل لمطعم على النيل جميل جداً وقامت نور وقفت قدام النيل تبصّله كعادتها كل ما تكون فرحانة أو زعلانة، قعد أدهم يبص عليها وقام راح وقف جنبها
فضل باصصلها شوية وهي باصة للنيل بهدوء وقطع الصمت وهو بيقول: شكلك حلو أوي النهاردة
ابتسمت بخجل دارته بغيظ: يعني باقي الأيام وحشة مثلاً يا دكتور