مراد: أه يا حبيبتي النهاردة بعد العصر ان شاء الله، انا متشكر أوي يا أمي إنك وقفتي جنبي ودعّمتي موقفي قدام مرات عمي وأدهم والكل
ثريا: مراد أنا نفسي ابني وبنتي يكونوا مبسوطين وبخير وبس والفلوس يا ابني مش هي مقياس السعادة والشقاء، الفلوس
وسيلة للمعيشة قلّت أو كترت، أهم حاجة الاحترام والمودة والرحمة والتفاهم بين الزوجين عشان يقدروا يبنوا عائلة سويّة ويجيبوا أطفال أسوياء وعلى خُلُق، أهم حاجة عندي ان البنت على خُلُق ومحترمة ومتعلّمة وان ابني حبيبي معجب بيها ها، ومرات عمك وأدهم وباقي العائلة كلهم لما يشوفوا أد إيه انتم مبسوطين سوا هينسوا فروق المستوى والكلام ده
ب.اس مراد إيديها بحب: منحرمش منّك أبداً يا ست الكل
نور نزلت الورشة وقالت لأميرة توضّب البيت وتلبس عشان جايلهم ضيوف بس مقالتش مين
وصل مراد وأهله الحارة وسألوا على بيت الأسطى محمد وواحد من الحارة دلّهم على البيت والشقة كانت في الأرضي
خبطوا وراح أمير فتح الباب ودخل معاهم الصالون
خرجت نور ومعاها أميرة اللي اتفاجئت بوجود مراد وأهله ومامت مراد اتعرّفت على الأسطى نور وكانت فخورة جداااا بيها
وبتربيتها لأخواتها وقروا الفاتحة وحددوا ميعاد الخطوبة بعد شهر
بعد يومين لبست نور هدومها وراحت على الجامعة عشان تكمّل باقي ورقها قبل بداية الترم
كانت لابسة فستان أزرق وخمار بيبي بلو وكان شكلها جميل أوي