( عمر بيلعب في تليفونه وبيبص على صورها وبيكبر في ملامحها ..جرس الباب رن ..قام بكسل يفتح ).
عمر: ايه دا مراد باشا ..خير دا انا لسه سايبك من ساعتين .
مراد: ياعم وسع انا جاي لابوك اصلا …مشوفتوش من زمان .
عمر: مش هنا … نزل القهوة يقعد مع صحابه .
مراد: يا خسارة … روح اعملنا اتنين قهوة بقى ونقعد نلعب دور بلاي ستيشن لغاية ما يجي .
عمر: طايب .
( عمر دخل المطبخ يعمل قهوة ومراد طلع تليفونه ).
مراد بصوت عالي: عمر ماتجيب رقم سيف اللي في المرور … عاوزه في حوار .
عمر من المطبخ: افتح التليفون هاتلاقيه متسجل بسيف وجنبه رقم ١ .
مراد: الباس ورد بعيد ميلاد مامتك صح .
عمر: اه وبطل دوشة … علشان القهوة متفورش .
( مراد مسك تليفون عمر واول ما فتحه ظهرله صور ليان اخته .. مراد اتصدم واتفرج على صورها في الساحل مع عمر … جاب رقمها لقي رسايل مبعوته ليها ..بس اتفاجئ ان عمر بيبعتلها من رقم غير رقمه ..ضغط على رقمه واتصل ظهرله على تليفونه رقم غريب ياعنى عمر جايب رقم بيكلم اخته منه … مراد شاف الرسايل الدم غلي في عروقه واتعصب … عمر كان بيصب القهوة وشال الصينية ولسه بيلف اتفاجئ بمراد بيضربه في وشه بالبوكس عمر وقع بالصينية على الارض ).
مراد بغضب: انت واحد ****** … صور اختي بتعمل ايه في تليفونك يا وقح وبتبعت رسايل ليها .. بتخون صاحبك … بدخلك بيتي وانت بتبص على اهل بيتي … العيب مش عليك .. العيب عليا انا .
عمر: انا بحبها يا مراد … انا مش خاين ليك .. انا بس مكنتش قادر اجاي واقولك لاسباب كتير واولهم انتوا هاتقولوا عليا خاين وهاتفكروا فيا تفكير غلط … وانت بالذات اول ما تعرف هاترفض وهاتقول كلامك ليا دلوقتي اني خاين وببص على اهل بيتك ..
يعلم الله انا بحاول ازاي ابعد عنها يعلم الله ازاي انا بحاول وبجاهد اشيل حبها من قلبي .
مراد بحدة: ورسايلك ليها وكلام الحب .
عمر: هاطق هاموت شايفها بتكبر قدامي وممكن في لحظة تتخطب وتروح مني …فكرت اريح نفسي وابعتلها واقولها .
مراد بضيق: انت صح شيلها من قلبك … لانها عمرها ماتكون ليك يا عمر … عمرها .
( مراد ساب عمر ومشي متعصب ).