ياما ضغطو على امك يبو ياخدو منها فلوسها وجربو كللل الطرق لكن امك كانت ذكيه وقويه محدش يقدر يفوته عليها
لين دارو خطتهم الحقيره هادي وشوهو سمعتها بين الناس وحبسوها
قعد بوك يساوم في امك وهيا في الحبس
يا تتنازلي على كل شي ونطلع ونغير اقوالي ونطلعك من الحبس يا اما تقعدي عمرك كله محبوسه وماتتمتعيش بي رزقك !
نجمه:ساكته وهيا تسمع وقلبها كان حاس من البدايه ان القضيه قضية رزق وفلوس مش شرف !
كريمه:ولو مشيتي مستحيل يخلوك يابنتي
لان عارفين كويس ان امك كتبتلك كل الاملاك متاعها بي اسمك
نجمه:نصدمت……..املاك؟!
يعني في شي غير ها الشقه
كريمه:فيه هلبا يابنتي وكل الاوراق عندي محافضتلك عليها
خافي ع نفسك متمشيش رح يساوموك بحريتك زي ما دارو في امك
نجمه:حطت راسها بين يديها وهيا تحاول تستوعب يلي صاير وتفهم شوي شوي
__________________________________
في السياره :-
كفاح:خليت البنات من امس في حوش بوي منبيش نرفعهم يقلبو الدنيا قدام الناس
شيخه:ارتحتي والله …..وين انور ؟
كفاح:انور تعبان في الخدمه تعرفي مسكين الشغل واخد كل وقته
نجم الدين :شافلها في المرايا ……..اي شغل؟
كفاح:بدي يخدم في محل صاحبك قالي مصاريف البنات زادو وعندي وقت خلي نستغله
نجم الدين:غريبه مقاليش
كفاح:مليشي اسبوع ره بالك مصارتش فرصه بس
شيخه:نجم درس خود حاجه نخشو بيها عيب فاضيين
نجم الدين :درس يمينه خدي نضراته ونزل
شيخه:مسكت تالفون نجم الدين دارت في دوره محصلت شي
اخر حاجه ضربها الفضول وخشت لي بحث القوقل ولقت كل البحث عباره على
تعليم حركات رومنسيه بين الازواج
كيف تقع زوجتي في حبي
ما هوا الشي يلي يعجب الزوجه ؟
ماهو الشي الدذي يفعله الزوج يسعد زوجته
ضحكتتتتتتت شيخه ورجعت التالفون في مكانه
نغم:خاشه لي قصم الطواري وهيا راقده علي الباريلا ومدخلينها بسرعه لان كانت حالتها مستعجله
رغم تعبها وعيونها يلي كانت شبه مسكره بس لمحت طه !
مكانش جنبها ولا مساندها ولا هوا يلي اسعفها اصلا!
بس شن جاب طه ع المشفى!؟
ملحقتش حتى تسأل السؤال هادا لي نفسها لانها خشت في حالة اغماء تااااام
______________________________
الصاله كانت معبيه نبيله وبنتها هديل وكفاح وشيخه وريحانه
والمربوعه كان فيها فتحي ونجم الدين ونصر ونذير وبوهم عصمان ومعاهم شخص من الجيران
هديل:قدمت العصير للكل وقعمزت
نبيله :كملت هدرزتها ……..والله صغاري كلهم هكي درتلهم وبدات هديل بنتي كانت عياطه هلبا وهسا صغيره
ريحانه:حتى وهيا كبيره الحق
هديل:سكتت وهيا كاتمه غضبها قدام الناس
كفاح:انا بنتي الكبيره محسيتش بيها الحق لكن الصغيره يا لطيف نار حمراء
ريحانه:انا حمودي ياحليلي زي النسمه متحسيش بوجوده بكل
شيخه:من حمودي؟
ريحانه:ولدي
شيخه وكفاح جاهم ايرور ….ومفهموش كيف ولدها ؟!
كفاح:سألت بي غباء ……..اءء كي كيف ولدك؟!
ندى:قاطعت الموضوع باش ميصيرش احراج …….نفكر نروح معاكم يومين نريح فيهم
من يوم تزوجت وانا حاسه نفسي تعبانه بسبب وبدون سبب
نبيله:بسم الله عليك يا بنتي عين وصابتكم والله حتى الحادث هادا عين وما صلت على النبي الله يبارك عليكم الزوز
هديل:اي والله طالعين مع بعض تهبلو
اما الناس التانيين مفيش حد معبرهم لا بي عين لا خشم
نبيله:نوضي سلم بنتي حطي العشاء ع النار نوضي وياسر من المناشبه انتي ومرت خوك
كفاح وشيخه ميتين ضحك
__________________________________
رباب:فتحت عيونها بتعب
طه:كان جنبها ماسك يدها وعيونه متورمات اول ما حس انها فاقت فز من مكانه
رباب:شن صار
طه:اشششش ارتاحي يا قلبي ارتاحي حادث صغير ومشي
رباب:طه تعبت …….نبي نروح نبي اهلي خلاص معش قادره
طه:باسها ع راسها ….اهدي شوي
رباب:معش نقدر كلم حد منهم يجيني
طه:يمسح على شعرها بهدوء ……مستحيل نخليهم ياخدوك مني
انتي ليا بس انا مستعد نصرف عليك لاخر عمري ناخدلك يلي تبيه ونديربالي عليك
رباب:منبيش شي منك
خليني في حالي بس نوض امشي طه
طه:يمسح على شعرها ….اشششش اهدي اهدي
انتي تعبانه بس
رباب:غمضت عيونها بي استسلام ومعش زادت كلمه معاه
________________________________________
نغم:فتحت عيونها وحاسه بدوخه رهيبه
قعدت فتره تحاول تتماسك لين اخيرا استقر وضعها