چنى: طيب يلا عشان نبدأ اليوم
وبدأوا اليوم سوا وخلصت قمر تمارين العلاج الطبيعي ورجعت اوضتها ساعة الغدا فلقت نوع شيكولاته هي بتحبه ومعاه كارت صغير جنب سريرها فمسكت قمر الكارت وقرأته وابتسمت وسألت الممرضة: مين اللي جاب دي؟
الممرضة: مرضاش يقول اسمه
قمر: شكرا
وخرجت الممرضة ودخلوا چنى ونبيلة عشان ياكلوا مع قمر فاستغربت نبيلة من الشيكولاته اللي ف ايد قمر وسألتها: ايه دي؟
قمر: شيكولاته
نبيلة: مين اللي جابها؟
قمر: معرفش
چنى: هو اكيد الواد بتاع الورده
قمر: تفتكري؟
چنى: اكيد
نبيلة: طيب يلا عشان قمر تاكل
وقعدوا كلهم ياكلوا سوا وبعد ما خلصوا اكل نزلت قمر مع چنى الجنينه تتمشى لحد ما قالت: كفاية كده يلا نطلع
وبعد ما طلعوا ريحت قمر على سريرها وطلبت من امها تطفي النور عشان تنام ونفذت نبيلة كلامها ورجعت نامت عالسرير اللي جنب سريرها اما قمر ففضلت
صاحية بتفكر وبتسأل نفسها: معقول؟! لا اكيد مش هو؟ صح؟ لا مش هو يا قمر……
مين اللي بيبعت لقمر الحاجات دي؟
نرجع لفارس
تاني يوم حضر الدكتور ودخل اوضة فارس يطمن عليه، وبعد ما خلص كشف سأله فارس: عملت اللي قولتلك عليه؟
الدكتور: طبعا
وخرج من جيبه كارت باسم دكتور نفسي وناوله لفارس وقال: ده احسن دكتور من وجهه نظري وتقدر تروحله اي وقت
فارس: شكرا
وبص لنفسه وسأل الدكتور: هو انا هفضل راقد كتير
الدكتور: لا الافضل انك تقوم وتتحرك طبعا
فارس: امتى؟
الدكتور: من بكره لو حبيت
فارس: شكرا يا دكتور
ومشي الدكتور وبعد شويه دخل سيف لفارس وقعد قدامه فسأله: في ايه؟
سيف: عملتلك اجازه مرضي شهر
فارس: ليه شهر، انا هبدأ اتحرك من بكره
سيف: كده احسن لحد ما تتعافى خالص
فارس: ماشي
سيف: اسيبك بقا مع نادين واروح لمراتي قبل الاجازه ما تخلص
ضحك فارس وقال بهزار: روح، ربنا يقويك
سيف: قُر ياخويا قُر مشوفتهاش غير يوم، معرفش مين اللي باصصلي ف ام الاجازه دي
فارس: روح يا عم متقرفناش
سيف: ماشي
ومشي سيف وبعد شوية دخلت نادين بالغدا لفارس وحطته قدامه وسألته: عامل ايه النهارده؟
فارس: الحمدلله، انتي اللي عامله الغدا؟
نادين بابتسامة: ايوه
ورفعت معلقة من الاكل وقربتها منه وقالتله: دوق بقا وقول رأيك
فبعدها فارس عنه وسألها: انتي اكلتي ولا لا الاول؟
نادين: اكلت خفيف كده مع عمي عشان ميزعلش
فارس: طيب كُلي معايا
نادين: حاضر
وبدأت نادين تاكل مع فارس وتأكله بأيدها وبعد ما خلصوا قال فارس: شكرا، تعبتك معايا
نادين: تعبك راحه، عن اذنك
وشالت الاكل من قدامه وخرجت من الاوضة، ورجعت تاني وفضلوا يتكلموا سوا لحد ما اليوم خلص
*********
وتاني يوم الصبح صحي فارس ونادى على نادين اللي كانت نايمه عالكُرسي قدامه من التعب فصحيت وسألته: مالك عاوز حاجه؟
فارس: ساعديني اقوم
نادين: حاضر
وساعدته يقوم من سريره وبعد ما وقف سألته: اساعدك في حاجه تاني؟
فارس: لا انا تمام
وخرجت نادين من الاوضه، اما فارس فبدأ يجهز نفسه وبعد نص ساعة خرج فارس من اوضته فسألته نادين: على فين؟
فارس: مشوار وجاي، ولما بابا يصحى افطري معاه
نادين: لا هستناك
سابها ومشي، ونزل ركب عربيته وطلع على عنوان الدكتور النفسي وبعد الظهر رجع فارس شقته لقى والده ونادين مستنيينه فسألهم: في ايه؟
نادين: عمي مرضاش يفطر من غيرك
فارس: انا اسف اوي يا بابا
الحج سالم: انا معرفش انت عاوز تعمل ايه ف نفسك؟
فارس: ولا حاجه يا بابا
وراحت نادين جابت الفطار ورصته عالسفرة وبدأوا يفطروا سوا…….
*************************
نروح لسيف
خرج سيف من عند فارس ووصل بيته بعد ربع ساعة، ودخل لقى چنى واقفه ف المطبخ فسألها: بتعملي ايه؟
چنى بخضه: خضتني يا سيف، بعمل الفطار
فقرب منها وحضنها فسألته: فارس عامل ايه؟
سيف: الحمدلله احسن، وانتي قمر عامله ايه؟
چنى: الحمدلله هتخرج كمان كام يوم كده
سيف: كويس، تعالي بقا عشان في موضوع مهم اوي عاوزك فيه
ضحكت چنى وقالت: مش هينفع
سيف: اوعي تقولي انك….
چنى بابتسامة: لا لا ده حاجه تانيه
سيف باستغراب: اومال؟
چنى: هتبقا بابا خلاص
سيف بمفاجأه: بجد؟!
چنى: اه والله
سيف: بقالك قد ايه؟
چنى: شهرين
حضنها سيف بفرحة كبيره وقال: الحمدلله يارب الحمدلله
ورجع بصلها وضحك فسألته: بتضحك على ايه؟
سيف: افتكرت حوار دار بيني وبين فارس من شوية
چنى: حوار ايه؟
سيف: تعالي نقعد واحكيلك عليه….
*************************
نروح لقمر
ويمر يوم ورا يوم وحالة قمر بتتحسن اكتر وكل يوم الصبح بتلاقي ورده وجنبها نفس الكارت بكلام مختلف، وساعة الغدا تلاقي نوع الشيكولاته اللي بتحبه، وأمل كل يوم تزورها وتقولها على اخبار الكلية والمحاضرات وقبل خروجها بيوم كانت أمل قاعده مع قمر في اوضتها بيذاكروا سوا عشان حاجه متفوتهاش وفجأه
دخلت الممرضة عليهم بعد ما خبطت وناولت قمر نوع الشيكولاته اللي بتحبه وقالتلها: انسه قمر! في حد باعتلك دي
سألتها قمر بشك: هو الشخص اللي بيجيب الحاجات دي جه هنا قبل كده؟
الممرضة: لا يا فندم دي بنت صغيرة اللي بتجيب الشيكولاته
قمر: والورد؟
الممرضة: صبي محل ورد بيجيبه كل يوم الصبح
قمر: شكرا
ومشيت اما أمل فبصت لقمر باستغراب وسألتها: ايه الحكاية؟
قمر: في حد كل يوم يبعتلي ورده حمرا الصبح ونوع شيكولاته ساعة الغدا
أمل: بس الممرضه قالت بنت وولد
قمر: ماهو ده اللي محيرني، مش عارفه مين البنت دي
أمل: شكلها واسطه من حد معجب
ابتسمت قمر وقالت: بس ليه مش عاوزني اعرف هو مين؟
أمل: اكيد في يوم هيخليكي تعرفي
فرجعت الممرضة تاني وناولت قمر كارت وقالت: نسيت ده كمان
اخدته قمر منها وقالت: شكرا
وبعد ما مشيت الممرضة قرأت قمر الكارت واستغربت فسألتها أمل: في ايه؟
قمر: بيقولي لو عاوزه تعرفي انا مين، فانا هكون عندك في البيت بعد خروجك بالسلامة
وسكتت شوية فسألتها أمل: بتفكري في ايه؟
قمر: ايه اللي هيجيبه البيت
أمل: اكيد هيطلبك من والدك
قمر باستغراب: طيب ليه مزارنيش عشان اعرف مين هو
أمل: اكيد عشان خايف على سُمعتك، او ان حد يجرحك بالكلام
قمر: عندك حق
أمل: هتخرجي امتى؟
قمر: الدكتور قال بكره
أمل: على خير ان شاء الله، امشي انا بقا
قمر: ماشي
وتاني يوم خرجت قمر من المستشفى ورجعت البيت ودخلت اوضتها ترتاح، ومر كام يوم على خروج قمر وهي في اوضتها بتذاكر وبتراجع وفجأه دخل عليها ابوها بعد ما خبط وسألها: عاملة ايه يا حببتي؟
قمر: الحمدلله يا بابا
طارق: طيب في حد كلمني عاوز يخطبك، وانا شايف انه طيب وابن حلال وعارف ربنا وهيبقى مناسب ليكي
اتنهدت قمر وقالت: انا قفلت الموضوع ده خلاص، قوله لا او اجله انا مركزه دلوقتي في دراستي
طارق: لا هأجله احسن
قمر: اللي تشوفه حضرتك
طارق: ماشي هروح اكلمه، واسيبك بقا تذاكري
قمر: ماشي
وبعد ما طارق خرج فضلت قمر تذاكر لحد ما تعبت وقامت تنام
*************
تاني يوم الصبح جهزت قمر نفسها ونزلت من البيت عشان تروح الجامعة، وهي خارجه من باب العمارة قابلها صبي الورد وسألها: أنسه قمر؟
قمر: ايوه
صبي الورد: الورده دي عشانك والكارت كمان
ولسه هيمشي وقفته قمر وسألته: مين اللي بيقولك تبعتلي الورد ده؟
صبي الورد: معرفش اسمه والله
ومشي وسابها اما قمر فقرأت الكارت واستغربت شويه ومشيت راحت الجامعة، وبعد عشر دقايق وصلت قمر ودخلت الكُلية وقابلتها أمل وفضلوا يتكلموا سوا لحد ما دخلوا المدرج وقعدوا جنب بعض فسألتها أمل: كاتب ايه المرادي؟
قمر: كاتب “عندك حق، بعد الامتحانات احسن وهتبقا بطريقه حلوه”
أمل: ده مصمم عليكي بقا
قمر: بس انا معرفوش
وفجأه دخل دكتور أنس المحاضرة فاستغربت قمر وسألت أمل: هما غيروا الدكاتره ولا ايه؟
أمل بصوت واطي: لا ده دكتور أنس هيراجع معانا مكان دكتور عمر لان عمر اخد اجازه
قمر: مممممممممم
وسكتت، فقال دكتور أنس وهو مركز نظره على قمر بابتسامة: صباح الخير يا دفعة
الطلاب: صباح النور يا دكتور
أنس باندفاع: انت حلوين كده ليه النهارده!! اااااااا قصدي يلا نبدأ
فضحكوا الطلاب وابتسمت قمر على كلامه، وهو كمان ضحك معاهم لحد ما بصلهم وسألهم بصوت عالي: مين كبش الفداء النهارده اللي هيتهزق ويتطرد؟
فسكتوا الطلاب كلهم، فكمل أنس بجدية: عندنا مراجعه لاخر فصلين النهارده وبعد كده اللي عنده اي سؤال يتفضل
وبدأ أنس يراجع معاهم ووقف كام واحد من الطلبه سرحانين وسألهم واللي مكانش بيجاوب بياخد كلمتين فيقعد لحد ما خلص وسأل: حد عنده اي سؤال؟
الطلاب: لا يا دكتور
أنس: بنك الاسئله هينزل النهارده بليل عالجروب ومش عايز حد يدخل خاص يسألني في حاجه
الطلاب: تمام يا دكتور
أنس: المحاضره خلصت
وخرج الطلاب كلهم وبدأ أنس يلم حاجته عشان يمشي فوقفه صوت قمر وهي بتنادي عليه فرد بابتسامة: ايوه؟ في حاجه واقفه معاكي؟
قمر بتوتر: لا يا دكتور
أنس: اومال ايه؟
قمر: هو سؤال تاني خالص
أنس بابتسامة: اتفضلي
طلعت قمر من شنطتها الكارت والورده وسألته: حضرتك اللي بعتلي دول؟
أنس باستغراب: لا مش انا
قمر: حضرتك متأكد؟
أنس بغيرة: ايوه طبعا، تلاقي حد بيلاعبك، سيبك منه وركزي ف الامتحانات
فدخلتهم قمر في شنطتها وردت: حاضر، شكرا يا دكتور
وسابته ومشيت اما أنس فرجع يلم حاجته ومشي بعدها راح لمكتبه…..