قمر: الحمدلله
ورجعوا يذاكروا سوا تاني، اما أنس فكان كل شوية يخطف نظرة لقمر بابتسامة صافية وهي تبادله النظرة بابتسامة مكسوفة لحد ما مشيت هي وأمل وكل واحده رجعت بيتها……….
*****************
نرجع لطارق واياد
وبعد يومين كان طارق واياد والحج سالم وراشد واقفين في المزاد
منافس١: ٥٠٠,٠٠٠ جنيه
منافس٢: ٧٥٠,٠٠٠ جنيه
منافس٣: ٧٧٥,٠٠٠ جنية
لحد ما وصل السعر لمليون ونص وهما واقفين ساكتين لحد ما الحج سالم قال: ٣ مليون من سالم المصري
ومحدش نطق بعدها فقال البايع: ١…٢…٣ مبروك يا استاذ سالم
فبص سالم لطارق وسلم عليه وقال: الف مبروك
طارق: الله يبارك فيك
وراحوا سوا يخلصوا ورق المزاد اما اياد وراشد فوقفوا يتكلموا مع بعض لحد ما رجعوا سالم وطارق، فقال طارق: نروح نتغدى سوا بقا بالمناسبة دي
وراحوا يتغدوا كلهم وقعدوا بعدها يقسموا البيعه بينهم وكل شركة تشوف اللي محتاجاه، فميل الحج سالم على طارق وهمسله بحاجه فسكت طارق شوية بابتسامة ورد وقال: اشوف رأيها ايه؟
الحج سالم: متقولهاش، لانه هيرجع الاسبوع الجاي وفرصه يتعرفوا على بعض في الحفلة
طارق: فكرة برضه، واكيد احنا مش هنلاقي نسب احسن منكم
وبعد الغدا كل واحد فيهم رجع بيته، ولما دخل طارق البيت لقى قمر في اوضتها فخبط عالباب ودخل لقاها قاعدة في البلكونه بتسمع اغنية حلوة وسرحانه
ومبسوطة فقعد قدامها وابتسم وسألها عن حالها فقالت: الحمدلله
طارق: والدراسة؟ اخبارها ايه؟
قمر: هانت خلاص
وسكتت شوية وقالت: في حاجه عاوزه اقول لحضرتك عليها
طارق: وانا كمان، بس انتي الاول
حكيتله قمر عن اللي حصل من معاذ معاها وحكيتله عن دكتور الجامعة اللي وقف معاذ عند حده، وبعد ما خلصت سكتت فابتسم طارق وقال: ربنا يبارك لأنس،
اما معاذ فانا هخلي اياد يتصرف معاه
قمر: ياريت يا بابا
طارق: المهم بقا، الاستاذ سالم المصري طالبك لابنه
سكتت قمر شوية فسألها طارق: مالك؟
قمر باستغراب: هو عنده ابن؟
طارق: ايوه
قمر: اومال ليه مشوفناهوش في الحفلة؟
طارق: كان في الشغل
قمر: بيشتغل ايه طيب واسمه ايه؟
طارق: بيشتغل ضابط جيش واسمه فارس
قمر: ايه؟……
كان طارق قاعد مع قمر في اوضتها واول ما قال اسم ابن سالم المصري ووظيفته قالت قمر باستغراب: ايه؟
طارق: ضابط في الجيش واسمه فارس
سكتت قمر تاني اما طارق سألها: مالك؟
قمر بهدوء: هو اللي طلبني ولا ابوه
طارق: ابوه طلبك له
اتنهدت قمر وقالت: قراري هقوله في الحفله
طارق: ماشي، اسيبك بقا
قمر: طيب
وباسها من راسها وخرج من الاوضه، اما قمر فضلت قاعده مكانها بتفكر لحد ما اتصلت بچنى وحكيتلها اللي حصل فسألتها: وانتي ايه رأيك؟
قمر بهدوء: هقولك عليه يوم الحفلة، مش انتي وسيف هتحضروا؟
چنى: ايوه
قمر: خلاص يبقا هتعرفوه كلكم
وقفلت المكالمة وقامت راحت تتوضئ وتصلي ركعتين لله وبعد ما خلصت نامت……
*******************
نروح لفارس
كان فارس في مبيت الضباط بيلم حاجته عشان يمشي ساعة ما دخل عليه سيف وسأله: على فين؟
فارس: اجازه
فطلع مفتاح من جيبه وناوله لفارس وقال: خد ده
اخده فارس منه وسأله: ايه ده؟
سيف: مفتاح شقتك
فارس: جبته منين؟
سيف: من ابوك
فارس: طيب
وسكت شوية فسأله سيف: بتفكر في ايه؟
اتنهد فارس وقال: بفكر هبدأ بايه ولا ايه
سيف: قصدك ايه؟
فارس: موضوع مي، ولا قمر ولا نادين ولا ابويا
سيف: ابوك خلص موضوع مي خلاص، وعاوزك تروحله
فارس: ليه؟
سيف: معرفش، يمكن عاوز يصالحك
قفل فارس شنطته ونزلها عالارض وقال: هروحله اشوفه
سيف: ماشي، وانا هنزل اجازة بكره
فارس: طيب
وخرج فارس من المبيت وطلع عالمطار وبعد ٣ ساعات كان في شقته في القاهرة وحط شنطته على جنب ودخل اوضته ونام وبعد ساعتين صحي على صوت رنة تليفونه برقم ابوه ففتح بسرعة ولسه بيرد عليه بلهفه، لقى ابوه بيقوله: من غير كلام، قدامك ٣ ساعات وتكون قدامي في العزبة
فارس: حاضر
وقام لبس ونزل ساق لاسكندرية وبعد ساعتين ونص كان واقف بالعربية قدام العزبة لحد ما الحارس فتح له البوابة ودخل بعربيته وركنها وطلع لابوه اوضة المكتب وقعد قدامه وسأله: في ايه يا بابا
الحج سالم: انا خطبتلك قمر
وقف فارس فجاه وقال باستغراب: ايه؟
الحج سالم: زي ما سمعت، وهتصل بابوها عشان نعرف رأيها لما نروح القاهرة وكمان عشان الحفلة