سيف: من النهارده، اتفرج بقا على كمية القضايا ده في شباب كتير هتشحت
فارس: ليه؟
ضحك سيف وقال: تخيل واحد كان واعد خمسه سته بالجواز وخلع وكلهم استخدموا القانون ده ضده، لا وكمان لو مش معاه فلوس شوف بقا هياخد كام سنه
مردش فارس عليه وقام مشي، فاستغرب سيف من تصرفه وبعدين ابتسم وقال: يا ترا يا قمر هيهون عليكي؟
**********
رجع فارس مكتبه وفضل رايح جاي يفكر بقلق في كم البنات اللي وعدهم بالجواز وخلع وبالاخص في قمر وقال لنفسه: ميمنيش اي واحده غيرها، يا ترا هتعمل فيا ايه
وقعد حط راسه بين ايديه وبدأ يكلم ربنا ويترجاه انه يساعده لحد ما سمع صوت رساله على تليفونه ففتح التليفون وقرأها و بعد ما خلص فضل مصدوم الرساله بتقول “والله ما هتفلت من ايدي، مبروك الحبس مقدما”………….
نرجع لسيف
بعد ما فارس خرج من مكتب سيف، تليفون سيف رن برقم الحج سالم، فرد عليه وحكى الحج سالم عن الحفلة اللي حصلت عنده ف البيت فرد سيف: حلو
الحج سالم: وفارس عامل ايه؟
فرد سيف: كويس، بس لسه تايه شويه
الحج سالم: لسه معقلش؟ في حكاية قمر
اتنهد سيف وقال: المشكله مبقتش في قمر بس
الحج سالم بقلق: عمل ايه تاني؟
سيف: هو حضرتك مقرأتش القانون الجديد
الحج سالم: قانون ايه؟ مش قصدك بتاع السحر والشعوذه
سيف: لا ده جديد، تبع الاحوال الشخصية باين
الحج سالم: بيقول ايه؟
سيف: اي بنت معاها حاجه تثبت بيها على ولد انه وعدها بالجواز وهرب هتقدر تسجنه او يدفع غرامة والغرامة مفتوحة، وفي حالات هيدفع ويتسجن
الحج سالم: وده طلع امتى؟
سيف: من يومين، وتم تفعيله
الحج سالم: وفارس يعرف؟
سيف: اه بس انا قولتله انه اتفعل من النهارده لما لقيته قلق
الحج سالم: ويقلق ليه؟
سيف: يمكن قمر تستخدمه ضده او اي واحده تانيه هو كان يعرفها
الحج سالم بقلق: تفتكر؟
سيف: مش بعيد، محدش عارف الايام مخبية ايه؟
الحج سالم: عندك حق، المهم خلي بالك منه وطبعا زي العادة متقولش اني سألت عنه
سيف: حاضر
وقفل المكالمة ومسحها من التليفون وخرج من مكتبه يلف على عساكر الخدمة، وهو في الطريق عدا على مكتب فارس فلقاه بيزعق جامد فخبط على الباب ودخله……
********************
نروح للحج سالم
كان في بيته قاعد ف التراس بيفكر في كلام سيف والقانون الجديد وبعدين اتصل بالمحامي يسأله فرد عليه وقال: ايوه يا حج الكلام ده صح
الحج سالم: والقانون عالكل ولا ممكن استثناء، وانت فاهم طبعا
المحامي: لا يا حج، عالكل على ابن الوزير واللي عندهم سُلطة في اي حتة ودول غرامتهم اعلى وحبسهم اطول
الحج سالم: كمان يعني مقفلة؟؟
المحامي: ايوة، والطُرق اللي من تحت لتحت اللي هتحصل من الطرفين، هيتم اضافة حُكم عليهم
الحج سالم: يعني مفيش اي ثغرات فيه؟
المحامي: لا الحل هو انه يحصل صُلح مع المُدعي
الحج سالم: تمام، شكرا
وبعد ما قفل مع المحامي قعد يفكر ويقول: يا ترا ايه مصيرك يا فارس
وفجأه لقى فارس الصغير بيقعد جنبه وهو ماسك التليفون وقال: مساء الخير يا جدو
الحج سالم بابتسامة: مساء الخير، رجعت امتى من المدرسة
فارس الصغير وهو مركز في اللعب عالتليفون: من شوية
الحج سالم بعتاب: طيب فين حضن جدو
ابتسم فارس الصغير وقام عشان يحضن جده، بس لقى صبا جريت ناحية سالم وحضنته وهي بتقول: انا هحضنك الاول
فدبدب فارس في الارض وقال: لا انا الاول
فضحك الحج سالم وحضنهم هما الاتنين بحنية وحط بوسة على جبهة كل واحد فيهم وفضل يسألهم عن احوالهم وهما يجاوبوه وبعد شوية نادى الحج سالم: هاتو الاكل هنا عشان الولاد
وبعد شوية جه الاكل وبدأوا ياكلوا وفارس فتح تليفونه عشان يكمل لعب وصبا فتحت تليفونها عشان تتفرج عالتيك توك بس فجأه بدأت تتعصب فبصلها الحج سالم وسألها: بتعملي ايه؟
صبا: التيك توك مش راضي يفتح وكل شوية يظهرلي الرسالة دي
فاخد سالم التليفون منها وشاف الرسالة وبعد ما شافها ابتسم وقال: كويس والله انهم عملوا كده
فسألته صبا: هيفتح يا جدو؟
الحج سالم: لا يا حببتي
صبا بزعل: ليه؟
الحج سالم: حظروه في مصر
صبا: يعني ايه؟
الحج سالم: يعني مش هيفتح تاني، روحي نادي ماما عشان اقول لها
صبا: حاضر