الحج سالم: لا
فارس: اقولك انا، هي خلتني افقد الثقه ف كل البنات، قعدت تبيع وتشتري فيا واستغلتني لانها كانت عارفه اني مقدرش استغنى عنها وبحبها اوي، وبعد ده كله عرفت انها عملت علاقه مع حد من اصحابي اللي هنا
وبدأ يعيط وكمل وقال: وعارف لما واجهتها قالتلي ايه؟
الحج سالم: ايه؟
فارس بكسرة نفس: انا ايه يربطني بواحد شايل روحه على كفه، في اي وقت ميبقاش موجود، وانا عاوزه اعيش
الحج سالم: ده مش مبرر انك ترد اللي اتعمل فيك في واحده تانية حبيتك ووثقت فيك
فارس: انا عارف اني غلطت، وصدقني الفترة اللي فاتت اتعلمت كتير
الحج سالم: يعني عقلت؟
فارس: ايوه
الحج سالم: وهتتجوز قمر؟
سكت فارس وبص ف الارض فقاله ابوه: اطلع بره
فارس: يا بابا….
الحج سالم: لسه بتعاند برضه، اطلع بره
فارس باستعطاف: طيب ابات هنا الليله دي بس
الحج سالم: هتبات في اوضة الكلاب معاهم، لكن البيت ده عمرك ما هتدخله تاني الا وقمر معاك
فارس بعند: اوضة كلاب؟ لا انا همشي ومش هتعرف لي طريق بعد كده
الحج سالم بقسوة: بالسلامة
ولف وطلع البيت وقفل الباب في وش فارس، اما فارس فركب عربيته وخرج يلف بيها لحد ما النهار بدأ يطلع وكلم سيف، اللي رد عليه بسرعة وسأله: انت فين؟
فارس: انا في الطريق جايلك، قدامي ساعة ونص بالكتير
سيف: طيب
وقفل معاه واتصل بالحج سالم وطمنه بإن فارس جايله، وبعدها دخل صحى چنى ووصلها لوالدتها ورجع بيته يستنى فارس، وبعد ساعة وصل فارس قدام بيت سيف وطلع عند شقته وسيف فتحله ودخل وحكاله عاللي حصل بينه وبين ابوه وبعدها قعدوا ساكتين وكل واحد فيهم في دنيا تانيه بيفكر لحد ما سيف سأله:
نويت على ايه؟
فارس:……………
يا ترى فارس هيعمل ايه؟
قعد فارس مع سيف في بيته وفضلوا يتكلموا سوا وبعدين سكتوا شويه وكل واحد كان في دنيا تانية لحد ما سيف سأله: فارس!! نويت على ايه؟
فقال فارس وهو موطي راسه وحاطط ايديه عليها: هرجع الشغل، ملهاش لازمه الاجازه
سيف: انا مش قصدي عالشغل
رفع فارس راسه وبصله وقال: فاهم قصدك، بس انا لسه ماخدش قرار
سيف: هسألك سؤال، انت….
قاطعه فارس: من غير ما تكمل، ايوه بحبها بس….
سيف: بس ايه؟
فارس: مي، اعمل معاها ايه؟
سيف: هحكيلك حاجه صغيرة وبعدها احكم
بدأ سيف يحكي يوم ما راح لوالد فارس بالتفصيل وبعد ما خلص قاله: عارف انك زعلان مني، بس انا عملت كده لمصلحتك
طبطب فارس عليه وابتسم وقال: عارف ومش زعلان منك، انت قولتها قبل كده ده حقك عليا، وانا كنت حاسس كمان ان في حاجه غلط فيا
سيف: ازاي؟
فارس: وانا معاها كنت حاسس ان في حاجه مكتفاني وعقلي بيقولي ان في حاجه غلط وقلبي مش قادر يحس بمشاعر ليها
سيف: طيب كويس اننا لحقناك، ودلوقتي هتعمل ايه؟
نفخ فارس بضيق وقال: مش عارف، مش قادر افكر او اعمل اي حاجه
سيف: انت حاسس بإيه؟
فارس: غضب ابويا عليا خلاني تايه وحاسس بخسارة كبيرة، واكيد امي الله يرحمها غضبانة عليا برضه والا مكانش شغلي وحياتي وقفوا في ثانية كده
سيف: والعمل
فارس: مش عارف، انا عاوز ارضيهم بس مش عارف ازاي
سيف: انت محتاج وقت تصفي دماغك وتهدا وتوصل لحل
اتاوب فارس بتعب وقال: صح
سيف: طيب قوم نام الساعة داخله على عشرة وربنا يحلها
فارس: ماشي
شاورله سيف عالاوضه اللي هينام فيها وسابه وراح ينام، اما فارس فدخل الاوضه وهو بيفكر وسرحان وفرد جسمه عالسرير ونام
*************
وبعد العصر صحي فارس مخضوض وبينهج مش عارف ياخد نفسه لحد ما هدي، فلقى نفسه لسه بجزمته وهدومه فقام غيرهم ولبس شورت قصير وخرج قعد في بلكونة الصالة بيشرب سجاير، في الوقت ده كان سيف صحي وقام لقاه بالمنظر ده فنادى وهو بيحدفله تيشيرت: انت مش عالبحر هنا، في جيران بنات
اخد فارس التيشيرت ولبسه وهو بيقول: مفيش حد واقف
فراح سيف قعد قدامه وقاله: برضه ياخويا انت مش عالبحر، هتاكل ايه؟