نروح لقمر قبل يومين
كانت قمر ف اوضتها بعد العصر، وقامت تصلي وبعد ما خلصت طلعت وقفت ف البلكونه شوية فسمعت اياد اخوها وهو واقف في شباك اوضته بيتكلم ف الفون بصوت حنين كده اول مرة تسمعه، فابتسمت ودخلت اوضتها وطلعت منها وراحت لاوضته وفتحت الباب بالراحه واتسحبت وجت من وراه وخضته وهي
بتمسكه من قفاه وبتقول: قفشتك
اتخض اياد والفون كان هيقع من ايده ولف وهو بيقول بصوت عالي: في ايييييه؟؟
حطت قمر ايديها في وسطها وسألته بابتسامة: بتكلم مين؟
فتح اياد سبيكر الفون وقال: بكلم حبيبتي، سلمي عليها
اتوترت قمر وسألته: عادي كده؟
اياد: اه عادي ما هنروح نخطبها بكره
وقال اياد لحبيبته: سارة، دي قمر اختي اللي حكيتلك عنها
سارة: ازيك يا قمر؟ اياد حكالي عنك كتير اوي
فرحت قمر وسلمت عليها وقالت بعتاب: بس انا اياد محكاش عنك
سارة: كده يا اياد، دي فيها خناقة
قمر بسرعة: لا لا ربنا ما يجيب خناق
سارة: ماشي، عشان خاطرك بس، وان شاء الله نبقا صحاب
قمر: ان شاء الله
اياد: طيب هقفل ونتكلم وقت تاني
سارة: ماشي
وقفل اياد الفون وبص لقمر: ايه رايك؟
قمر بعتاب: انا زعلانه منك
اياد: عشان مقولتش يعني؟
قمر: ايوه
اياد بابتسامة: انا قولت لبابا وماما ووافقوا عالخطوبه وحبيت اعملهالك مفاجأه، وكنا هننزل النهارده نشتري الهدوم اللي هنروح بيها
قمر بفرحة: بجد؟؟ يعني انا اتسرعت
اياد: ايوه وممكن بقا تروحي تلبسي
قمر برخامه عليه: بس انا عاوزه اشوف ذوقك
فتح اياد تليفونه على صورة سارة ووراها لقمر فقالت اول ما شافتها: حلوه اوي، اللهم بارك، ربنا يسعدكم ويهنيكم
باس اياد راسها بحنية وقال: ربنا يخليكي ليا، يلا روحي البسي عشان ننزل
قمر بفرحة: في ثواني
ولبست قمر ونزلت هي واياد يشتروا الهدوم وتاني يوم كانوا كلهم في بيت اهل سارة بيخطبوها لإياد……..
********************
نرجع لفارس مع موظف الريسبشن ف الاوتيل
موظف الريسبشن: الكارت مش شغال
فارس: يعني ايه؟
موظف الريسبشن: البنك وقف الحساب
استغرب فارس ورد: طيب كلم خدمة العملاء هناك وأتأكد
وفعلا اتصل الموظف بخدمة العملاء وفارس كلمهم فرد موظف خدمة العملاء: والد حضرتك طلب وقف الحساب المشترك بينكم، بما انه المتحكم فيه
قفل فارس في وشه بعد ما سمع الكلمتين دول وبقا هيتجنن مش عارف يفكر ولا يعمل حاجه وموظف الريسبشن بيسأله كل شويه: هتعمل ايه يا فندم؟
فرد فارس: كنسل الحجز وانا هطلع اجيب شنطتي
موظف الريسبشن: تحت امرك
وبعد ما خرج فارس من الاوتيل ركب عربيته وراح لعزبة ابوه وهو في الطريق اتصل بسيف
**********
في الوقت ده كان سيف ومراته في الاقصر بيجهزوا نفسهم عشان يروحوا أسوان ساعة ما فارس اتصل عليه وبلغه باللي حصل فسأله سيف: وهو عمل كده ليه؟
فارس بزعيق: معرفش معرفش
سيف: اهدا طيب
فارس: مش ههدا غير لما اعرف بيعمل فيا كده ليه
سيف: طيب انت فين دلوقتي
فارس: رايحله
سيف: بلاش يا فا…..
قفل فارس السكه في وشه، اما سيف فبص لچنى وقالها: لازم نرجع مصر دلوقتي في مصيبه هتحصل، جهزي الشنط
چنى بخضه: في ايه؟
سيف: فارس وابوه…
وقبل ما يكمل قامت چنى تنفذ اللي طلبه منها سيف وجهزت الشنط وسيف حجز على اول طيارة نازلة القاهرة، واتصل على الحج سالم يبلغه باللي فارس ناوي عليه، فرد عليه الحج سالم ببرود: وانا مستنيه
فحاول سيف يتكلم مع الحج سالم ويفهم منه اي حاجه لحد ما رد الحج سالم عليه: انا عارف بعمل ايه، متقلقش
سيف: طيب انا نازل القاهرة النهارده
الحج سالم: كويس، وجهز بيتك، وروح لابوك واقوله هات الامانه اللي سالم سابهالك
رد سيف من غير ما يعرف السبب: حاضر
اما فارس فكان سايق زي المجنون وقبل ما يوصل عزبة ابوه حاول يتصل به كذا مره بس برضه مش بيرد عليه، فاتصل باخته سلمى برضه مردتش عليه، وبعد دقايق كان قدام البوابه بالعربية ودايس عالكلاكس كتير عشان حد يفتحله، بس محدش طلع
فداس بنزين وكسر البوابه ودخل بالعربية قدام البيت ووقف ونزل منها وفجأه لقى حد بيضرب عليه نار……..
*****************