سيف: لا تعالى نخرج في حته بعيد عشان اعرف اتكلم معاك
فارس: تمام
ونزلوا عالجراچ فشاف سيف عربية فارس الجديده فباركله عليها وركب معاه وساق فارس بره المعسكر لحد ما وقف في حته بعيد عن الحضر فنزل سيف منها
ووقف بعيد شويه وهو بيغلي وفارس نزل وراه وسأله: في ايه يا سيف قلقتني؟
لف له سيف وقال: مش انا صاحبك ومن حقك عليا اعدلك لما الاقيك ماشي غلط ان مكانش بالكلام يبقا بالقوه وانت نفس الحكاية؟
فارس بقلق: اكيد، بس ليه؟
ضربه سيف بالقلم على وشه، انصدم فارس من رد فعل سيف ومنطقش اما سيف زعق فيه وقال: انت وسخ وندل
فارس باندهاش: في ايه؟
زعق سيف: ملعونه افكارك على تجاربك اللي عقدوك وخلوك تفكر ان كل البنات شمال
مفيش رد من فارس
فكمل سيف: عملت كده ليه؟
فارس باستغراب: عملت ايه انا مش فاهم
سيف بزعيق: قمر!!
فارس بلهفه: مالها؟
سيف: ليه وهمتها بالجواز وخدعتها؟
ولسه هيضربه تاني قام فارس مسك ايديه وقاله: انا مخدعتش حد، اللي حصل بيني وبينها كان عالنت يعني ملمستهاش
سيف بزعيق: هتفرق ماهو زفت برضه
فارس بكدب: كان برضاها
شد سيف ايديه منه ورزعه بوكس رماه على عربيته وقال: مكانش برضاها، انت اللي ضغطت عليها ووهمتها وخلعت عشان خلاص مبقتش تنفعك
قام فارس ووقف قدامه وقال بجبروت: ايوه انا ايش ضمني انها لسه بنت
سيف: انت بتخوض ف عرض واحده وتتهمها بالكدب كمان
فارس: لا مش كدب
سيف: عندك دليل؟ عندك شهود؟ شوفت عليها حاجه؟؟
فارس: لا، بس طالما عملت كده معايا تبقا عملت مع غيري
سيف: اخرس دي اشرف من اي واحده انت قابلتها
وضربه بايده وقعه عالارض وكمل وشاورله: انت وسخ وعاوز واحده زيك تعرفك الفرق بينها وبين قمر
بدأ فارس يحس بندم فحط وشه في الارض بكسوف ومردش عليه، اما سيف فشده من هدومه ووقفه قدامه وبدأ يزعق فيه: اقلع البدله دي لانها مش ليك دي للرجاله اللي عارفه ربنا
حاول فارس يدافع عن نفسه فقال: يا سيف اسمعني، انا…
فقاطعه سيف: انا مش عاوز اعرفك تاني، المأمورية دي اخر حاجه بيني وبينك، وهطلب نقلي بعدها
وسابه ومشي فنادى فارس عليه: رايح فين؟
سيف بعصبية: رايح في داهيه ملكش دعوه بيا
ركب فارس عربيته وطلع وراه وفضل يترجاه انه يركب معاه بس سيف رفض وركب اول عربية جيش قابلته ورجع عالكتيبه وفارس رجع وراه وكل واحد راح مكتبه، وبعد ما اليوم خلص راح فارس لمبيت الضباط ودخل شقته هو وسيف بس ملقهوش فيها فحاول يتصل به كذا مره بس مردش عليه، فدخل اوضته وقعد على سريره وفضل يفكر لحد ما غلبه النوم……
*******************
نروح لقمر اللي رجعت البيت بعد ما اياد وصلها ودخلت اوضتها وفضلت تعيط لحد ما نامت، وبعد ساعتين صحيت قمر على صوت تليفونها اللي بيرن برقم ملك فردت عليها بسرعة فقالت ملك: الحقيني يا قمر
قمر بخضه: مالك؟
ملك: انا شكلي بولد وجوزي مسافر مش هنا
قمر: انا جايه حالا
وقفلت معاها وغيرت هدومها بسرعة وقالت لوالدتها اللي لبست في ثواني وكانوا عند ملك في البيت واخدوها عالمستشفى وهناك اتصلت نبيلة بطارق وبلغته باللي حصل، اما قمر فاتصلت باهل ملك اللي وصلوا بعد ساعة، وبعد ساعتين طلعت ملك من اوضة العمليات ودخلت اوضة مجهزه ليها ولبنتها، ودخلوا اهلها
يطمنوا عليها وبعد شوية دخلت قمر ووالدتها واول ما شافتها ملك نادت عليها فراحتلها قمر
ملك بابتسامة: شكرا يا قمر
وعرفت اهلها بقمرووالدتها فبصلها والد ملك وسألها: انتي اللي لحقتيها؟
قمر: ايوه يا عمي
والدة ملك: كتر خيرك يا بنتي، شكرا
قمر: لا شكر على واجب حمدلله على سلامة ملك والنونه
ملك: الله يسلمك
نبيلة: نستأذن احنا بقا، يلا يا قمر
قمر: يلا يا ماما
*************
ومشيوا رجعوا البيت وهما داخلين البيت قابلوا چنى وسلموا عليها وسابتهم نبيلة يتكلموا ودخلت شقتها اما قمر فأول ما دخلت والدتها حضنت چنى وفضلت تعيط وحاولت چنى تهدي فيها فاخدتها على شقتها وفضلت تطبطب عليها وتواسيها، وحكيتلها قمر اللي حصل الصُبح مع معاذ فسألتها چنى: ليه موافقتيش عليه؟
قمر: مكانش ينفع واحد رفضني في الاول اقبله انا في الاخر
چنى: معاكي حق، اهدي بقا خلاص
قمر: انا تعبانه اوي انا عارفه اني غلطت بس ليه اشيل الذنب لوحدي، وليه هو يعيش حياته؟
چنى: عشان احنا في مجتمع بيشيل البنت الغلط لكن الولد مهما عمل غلط بيتقال عليه طيش