وقاموا خرجوا من القاعه اما علاء فراح لروڤان وادالها ورقه وقال: خدي الورقة دي
روڤان: ايه دي
علاء: ورقة طلاقك
اخدتها منه ورميتها في الزباله وقالت: خلاص ماهي خربانه خربانه
علاء: صح وادي نهايتكم
أميرة بسذاجه: اهم حاجه اني معايا توكيل اقدر اتمتع به بعدين
ضحك علاء وقال: لا وانتي الصادقه انتي بقيتي شحاته انا لغيته خلاص
وسابهم ومشي لما طارق نده عليه
**************
اما طارق وولاده فخرجوا لقوا معاذ واقف مستنيهم بره فاتفاجأوا وسأله اياد: ايه اللي جابك؟
وقف معاذ جنب طارق وقال: جاي اسمع الرد بعد اذنك يا استاذ طارق
بصله طارق وقال: الرد مع قمر مش معايا
وطبطب على كتف قمر وسألها: ايه رأيك يا قمر؟
بصتله قمر وقالت: انا حبيت اهتمامك بيا الفترة اللي فاتت مش اكتر لكن اتجوزك لا
وكملت وقالت: عن اذنكم
وراحت ركبت العربية، اما طارق فاعتذرله وسابه وراح ركب عربية علاء، اما اياد فوقف يتكلم معاه وحاول يطيب بخاطره فرد معاذ عليه: ده نفس الكلام اللي قولته لزياد عليها
اياد بعدم تصديق: بجد؟
معاذ بكسوف: ايوه، انا افتكرتها نسيت وسامحتني
اياد: مش عارف اقولك ايه
معاذ: متقولش حاجه كفايه اللي انا حاسه دلوقتي، هو نفس اللي خليتها تحس به زمان
اياد: ربنا يعوض عليك
معاذ: انا خلاص عرفت اني هعيش لبنتي وبس
اياد: متقولش كده، ان شاء الله تلاقي اللي تصونك وتراعي بنتك معاك
معاذ: ان شاء الله، عن اذنك
وكل واحد فيهم ركب عربيته ومشي
************
ولما اياد ركب العربية لقى قمر عماله تعيط فسألها: ليه الدموع دي؟
بصتله قمر ومسحت دموعها وقالت: ابدا مفيش
طبطب عليها اياد وسألها: مش انتي رفضتيه زعلانه ليه بقا؟
قمر: انا مش زعلانه عليه
بدأ اياد يشغل العربية وسألها: اومال على مين؟
قمر: زعلانه على نفسي وعاللي بيحصلي
اياد وهو بيتحرك بالعربية: نقول الحمدلله واحنا واثقين ان ربنا هيراضينا
قمر: الحمدلله
اياد: ها تحبي تروحي فين بقا؟
قمر: البيت، عاوزه اروح
اياد: ماشي لكن لازم نخرج ونتفسح عشان مبحبش اشوف اختي زعلانه كده
قمر: وقت تاني انا حاسه اني تعبانه وكمان بابا عمال يتصل بيك
اياد: ماشي يا ستي
ورد على طارق وسأله: انت فين؟
طارق:……….
اياد: طيب انا جاي هوصل قمر واجي
وقفل الخط ووصل قمر البيت وراح لوالده عالشركة……
نروح لسيف
صحي سيف الصبح قبل ما يسافر وقام فطر مع مراته وسألته وهو رايح ناحية الباب: هتعمل ايه
سيف وهو بينفخ بعصبيه بعد اللي عرفه امبارح من چنى عن قمر: بصي انا مش عارف وربنا يستر
حضنته چنى وقالت: خلي بالك من نفسك وطمني عليك
سيف بابتسامة: حاضر
ونزل ركب عربيته راح المطار وركب الطياره وبعد ساعتين كان في مطار جنوب سيناء
***************
بعد نص ساعة وصل سيف الكتيبه بعربيته ودخل لمبيت الضباط وغير هدومه ونزل راح لمكتب فارس وهو بيفكر بعصبية وغيظ من فارس، لحد ما وصل مكتبه ودخله لقاه في اجتماع مع المجموعه واول ما شافه ابتسم وقال: نعيد من الاول يا جماعة عشان سيف
وقال لسيف: شدلك كرسي
شد سيف كرسي وقعد يسمع تعليمات فارس وبعد ما خلص سألهم فارس: في اي استفسار؟؟
المجموعه في نفس واحد: لا يا فندم
فارس: هنتحرك الصبح
المجموعة: تمام يا فندم
فارس: انصراف
مشيوا كلهم الا سيف اللي فضل قاعد مكانه بيتكتك بالقلم على طرابيزه الاجتماعات بعصبية، فبصله فارس وقاله: انصراااف
قام سيف من مكانه وقاله: انا عاوزك ف موضوع
فارس بقلق: خير تعالى على مكتبي