حكالها سيف الحوار اللي دار بينه وبين فارس فعيطت وقالت: ندل حيوان
سيف بحزن: عارف
چنى: وهتعمل ايه؟
سيف بهدوء: لازم اتصرف لازم افوقه واوقفه عند حده
ورجعوا يتناقشوا ويفكروا سوا لحد ما سيف قال: انا هسافر دلوقتي
چنى: ماشي خلي بالك من نفسك وطمني لما توصل
راح سيف غير هدومه ونزل شغل عربيته واتحرك على طريق اسكندرية وبعد ٣ ساعات وصل لعزبة سالم المصري ووقف قدام البوابه وسأل واحد من الامن: استاذ سالم موجود؟
فرد الامن: ايوه نقوله مين؟
سيف: النقيب سيف عادل زميل ابنه فارس……
نروح لقمر
تاني يوم كانت قمر في اوضتها فاتحه حساب fake عالفيس ومنه فتحت صفحة فارس بتحاول تتطمن عليه بس لقت ان في بنت عملاله تعليقات وبتتفاعل معاه دايما فدخلت عندها وعرفت انها بنت خالته وانها ارتبطت به، فقفلت الصفحة وعينيها كلها دموع وقالت: نفسي ابقا زيك انسى في ثواني
وخرجت وقفت في البلكونه وبدأت تعيط
*********
في الوقت ده چنى كانت واقفه في بلكونتها بتكلم سيف عالتليفون بتطمن عليه وبعد ما قفلت سمعت صوت قمر وهي بتعيط فبصت جنبها عالبلكونه التانيه لقت قمر بتعيط فنادت عليها فرفعت وشها وبصتلها واول ما شافوا بعض أتفاجأوا
فقالت چنى: انتي قمر طارق
قمر: وانتي چنى اسماعيل
چنى بابتسامة: وحشتيني اوي، عامله ايه؟
مسحت قمر دموعها وقالت: الحمدلله
چنى بابتسامة: ما تيجي تقعدي معايا نتكلم شوية
قمر: طيب هستأذن واجيلك
دخلت قمر اوضتها وغسلت وشها واستأذنت والدتها تروح لچنى فسألتها نبيلة: مين چنى؟
قمر: صاحبتي يا ماما من ايام ابتدائي بس هي نقلت مدرسة تانيه
نبيلة: ياااااه ولسه فاكرين بعض
قمر: ايوه تخيلي بقا
نبيلة: وهي فين دلوقتي
قمر: ساكنه في الشقة اللي جنبنا، هروحلها بقا
نبيلة: ماشي
وراحت قمر لچنى اللي اول ما فتحتلها الباب حضنتها وقالت: وحشتيني اوي
قمر: وانتي كمان
چنى: تعالي ادخلي انا مش مصدقه
دخلت قمر بيت چنى وقعدوا يتكلموا كتير اوي وكل واحده حكت للتانيه عن حياتها وبعد شوية قالت چنى: معاكي صوره له
طلعت قمر تليفونها وفتحت صورة لفارس وناولته لچنى وهي بتقول: هو ده
بصت چنى للصوره وسألتها: وحصل ايه؟
قمر بحزن: معرفش فجأه سابني في نص الطريق ولا اداني اسباب ولا اي حاجه
چنى: اما ندل بصحيح، بكره ربنا يعوضك
قمر بحزن: يارب
چنى: هتتغدي معايا بقا
قمر: لا انتي اللي هتيجي معايا نتغدا كلنا سوا
چنى: هاستأذن من سيف طيب
قمر: ماشي ويلا قومي البسي طرحة وتعالي
اتصلت چنى بسيف واستأذنته ووافق وراحت اتغدت مع قمر وقعدت مع اهلها لحد ما سيف رجع، خبط عليهم واستأذنت چنى ورجعت البيت تاني…..
*************************