الدكتور: بكره
سيف: اعمله check up على كل حاجه عنده قبل ما يخرج
الدكتور: متقلقش حضرتك احنا عملنا اللازم وتقدر تزوره دلوقتي
سابه سيف وراح اوضة والده بعد ما سأل ممرضة ماشيه ودخل واول ما شافه والده نادى عليه بلهفه فراحله سيف وباس ايده ودماغه وقاله: سلامتك يا بابا
عادل وهو بيطبطب عليه: انا كويس يابني متقلقش
وقعدوا يتكلموا مع بعض ويضحكوا لحد ما والده نام وخرج سيف يستنى بره لحد تاني يوم الصبح ومخرجش الا ووالده في ايده، وبعد ووصله بيته واطمن عليه رجع بيته بليل وهو بيركن عربيته لقى حد بيركن مكانه فنزل اتخانق معاه وطلع بيته وهو ميت من التعب ودخل وهو بينادي على چنى
راحتله چنى لما سمعت صوته لقت شكله تعبان اوي ولسه هتسأله، راح مقاطعها وقال: هحكيلك بعدين، عشان مش قادر خالص عاوز انام
چنى بحنية: طيب تعالى
وسندته لحد اوضة النوم ونيمته على السرير ولسه هتقوم من جنبه قام شدها من ايدها وطفى النور….
***********************
نروح لقمر
بعد كام يوم كانوا نقلوا في البيت الجديد وكله بقا تمام ونزلت تقابل زياد ومعاها اخوها، واستأذنت منه يقعد بعيد شوية عشان يعرفوا يتكلموا فوافق بس كانت عينيه عليهم
قعد زياد قدامها وهو مكسوف منها فقالته قمر: ارفع راسك
زياد: مش قادر انا مكسوف من نفسي ومنك اوي
قمر بابتسامة: انا مسمحاك
رفع زياد راسه وبصلها باستغراب وسألها: بجد؟ حتى بعد اللي عملته ده كله؟
قمر: ايوه مش مهم اللي حصل المهم انك تبدأ من جديد
زياد بأمل: معاكي؟
شاورت قمر على قلبها وقالت: ده مش بايدي ولا اللي عندك بايدك
وبدأوا يتكلموا سوا وبعد شويه قال زياد باندهاش: امل؟
قمر: ايوه
زياد: انتي متأكده؟
قمر: ايوه طبعا وباين عليها في تصرفاتها
زياد برجاء: بس انا عاوزك انتي
فكرت قمر شويه وقالت: لو اتخطبنا يبقا كده هتثبت للناس التهمه عليك لكن لو محصلش الناس هتسكت
سكت زياد وبدأ يفكر في كلامها
اما قمر فطلعت من شنطتها شوية ورق وقالت: خد ده ورق القضية
زياد: اعمل به ايه؟
قمر: قطعه، خلاص كده مفيش سوابق ولا اي حاجه عليك، استأذن انا
ولسه هتقوم قام زياد مسك ايدها وقال: استني
بصتله قمر باستغراب فساب ايدها وقال: اسف اوي
سحبت قمر ايدها وسألته: عاوز ايه تاني؟
زياد: انا هقولك حاجه، اللي انتي عملتيه معايا كتير ووعد مني هفضل جنبك حتى لو محبتنيش بس عشان عالاقل اكفر عن ذنوبي في حقك
قمر: شكرا، عن اذنك
وقامت وسابته وراحت لاخوها اللي اخدها ومشيوا، وساق بالعربية وسأل قمر: ايه رأيك نتفسح؟
قمر بفرحة: طبعا
فضلوا يلفوا بالعربية كتير ويتفسحوا لحد قالت قمر وهي بتاكل غزل بنات: خلاص كفاية هفرقع
ضحك عليها اياد وسألها: اومال البيتزا دي مين اللي هياكلها؟
فقالت قمر وهي بتتاوب: هاتها ناكلها في البيت
*************
وصلوا قدام البيت وبدأ اياد يركن العربية وخلاص هينزلوا منها لكن فجأه لقوا عربية وقفت جنبهم وصاحبها خرج منها ونزل اف لاياد وهو بيقول: ده مكاني يا كابتن
اياد باستغراب: افندم؟!
سيف بعصبية: بقولك مكاني اتحرك اطلع قدام
همست قمر لاياد انه ميعملش مشكله فبصله اياد وقاله: حاضر
وفعلا اتحرك وسيف ركن مكانه والاتنين قفلوا وطلعوا نفس العمارة وهما في الانصنصير اتعرفوا على بعض لحد ما وقف وخرجوا فقال سيف: تشرفنا واسف عالزعيق
اياد: ولا يهم حضرتك احنا برضه تشرفنا بالمعرفه دي
سيف: تصبحوا على خير
اياد: وانت من اهله
ودخل كل واحد فيهم شقته
**********************
نروح لسيف، تاني يوم الصبح
صحي سيف على صوت مراته وهي بتغني وبتعمل الفطار فقام ودخل المطبخ وحضنها وهو بيقول: صباح الخير
چنى بفرحة: صباح النور يا حبيبي
مد سيف ايده ف الاكل وداقه بطرف صباعه وهو بيقول: ايه الحلويات دي؟
چنى: يلا عشان نفطر خد الاطباق دي يلا
اخد سيف الاطباق ورصها عالسفرة وقعد هو وچنى ياكلوا فسألته: مكملتش حكاية فارس
سيف بعصبية: سابها خلاص
چنى باندهاش: ليه بس؟