اياد: قمر عاوزه زياد يطلع وتتنازل عن القضية
طارق بغضب: ليه؟
اياد: بتقول هو غلط اه بس هي بخير وكمان عشان مستقبله
طارق: مستقبل ايه؟ سيبني انا هتكلم معاها
اياد: طيب
في الوقت ده رن تليفون اياد برقم معاذ فاستأذن يرد عليه وفي المكالمة سأله اياد عن حاله
فقال معاذ: الحمدلله، عاوزك في حاجه مهمه اوي
اياد: خير!!
معاذ: قابلني ف بيتي كمان نص ساعة
اياد: انا جايلك
وقفل الفون وقال لطارق: طيب يا بابا انا هروح لمعاذ
طارق: ماشي
**************************
نروح لبيت معاذ
وصل اياد لبيت معاذ ورحب به ودخلوا قعدوا يتكلموا سوا فسأله اياد: وانت اخبارك ايه؟
معاذ: الحمدلله
اياد: بنتك فين؟
معاذ: عند خالتها وهروح اخدها بليل
اياد: طيب، ايه الموضوع المهم اللي عاوزني فيه؟
معاذ: انا جبت ريكورد بمكالمة اميرة وروڤان
اياد: وبعدين؟
معاذ: ولا قبلين هيروحوا في داهية
اياد: ازاي؟
ففتح معاذ تليفونه على التسجيل الصوتي وقال: اسمع وانت تعرف
سمعوا أميرة وروڤان بيتكلموا سوا في الريكورد
******
أميرة: انتي اللي جبتي التعبان؟
روڤان: ايوه
أميرة: وحطتيه ازاي وامتى اصلا؟
روڤان: يوم ما كنت عندها اخر مرة، دخلت اوضتها وخبيته ورا سريرها وطلعت
أميرة: ليه؟ ما كنتي تستني وانا هجبلك اللي انتي عاوزاه لحد عندك
******
اياد بغضب: اقفل الزفت ده، ويلا عالقسم
معاذ بتردد: يلا بس انا ليا طلب عندك
اياد: خير!!
فكر معاذ شوية وقال: خلاص مش وقته نخلص موضوع أميره وبعدين اقولك
اياد: طيب
معاذ: طيب يلا عالقسم
اياد: يلا
اخدوا التليفون ونزلوا سوا راحو القسم
**********************
وبعد عشر دقايق وصلوا القسم ودخلوا عالضابط الموجود هناك واتكلموا معاه فقال معاذ وهو بيفتح تليفونه عالريكورد: انا جبت ريكورد مهم جدا لاميرة وبنتها
وقال اياد وهو بيطلع ورقتين من جيبه: وكمان جبنا ورق بوقت المكالمة من الشركة بمساعدة محامي عشان يبقا قانوني
الضابط: حلو اوي، يلا نسمع المكالمة
وبعد ما سمعوا الريكورد قال الضابط: طيب خليكم هنا وانا هبعت قوة تجيبهم
طلع ليا تليفونه وقال: ماشي وانا هكلم والدي عشان يحضر التحقيق
الضابط: تمام
كلم اياد والده عشان يحضر التحقيق وبعد نص ساعة وصل هو وقمر اللي كانت مصدومة من اللي عرفته فوقفت جنب اياد وسألته وهي خلاص هتعيط: ده بجد؟ يعني انا كنت هموت بسبب روڤان؟؟
اياد: ايوه وربنا نجاكي منها عشان انتي طيبه
عيطت قمر وقالت من بين دموعها: انا عملتلها ايه عشان تأذيني بالشكل ده
قرب منها طارق وحضنها وطبطب عليها بحنية وقال: مش قولتلك ان في ناس مهمتهم ف الدنيا الاذية وبس
مسحت دموعها وردت: ايوه يا بابا بس مكنتش اعرف انه ممكن يكونوا من الاهل كمان
طارق بمواساة: لا يا بنتي ممكن من الاهل كمان وادي جزاء المؤذي
*********************
في الوقت ده رجعت قوة الشرطة ومعاهم روڤان وأميرة وعلاء ودخلوا للضابط الموجود واخد اقوالهم وبعدين خرجوا واستنوا كلهم حضور وكيل النيابة، فبص طارق لأميرة لقاها معاها شنطة صغيرة فسألها: جايبة ايه معاكي المرة دي، اكل ولا هدوم ولا رش ولا تعبان زي اللي بنتك حططه في اوضة بنتي وكنتم السبب