الضابط: وايه السبب اللي خلاك تعمل كده؟
زياد بخجل: عشان بحبها، وكنت فاكر بالطريقه دي هتجوزها وتحبني
حاول اياد يضربه على وشه بس ايد معاذ منعته وهو بيقوله: اهدا خلاص
اياد بعصبية: مش سامع الكلام اللي ينرفز
الضابط: هدوووء والا كله هيطلع بره
وبص لزياد وسأله: معاذ له علاقه باللي حصل؟
زياد: لا يافندم
الضابط: ليك شركاء تانيين؟
بص زياد لطارق وقال: ايوه
الضابط: مين؟
زياد: اتنين اسمهم اميرة وروڤان، هما اللي اقنعوني بالفكرة دي، وقالولي ان ده انسب وقت عشان اعمل كده
الضابط: واتفقوا معاك امتى؟
زياد: كانوا معايا على تواصل طول الفترة دي
الضابط: معاك صور ليهم؟
طلع زياد تليفونه وفتحه على صور أميرة وروڤان وناوله للضابط وهو بيقول: اتفضل دول صورهم
فقاطعه طارق: ممكن اشوف الصور؟
اداله الضابط التليفون واول ما طارق شاف الصور قال بصدمة وحزن: كنت حاسس انهم
الضابط: انت تعرفهم؟
طارق: ايوة، دول زوجة اخويا وبنته
اياد للضابط: لو سمحت انا بتهم روڤان دي بمحاولة قتل أختي هي اللي جابت التعبان وكمان بتهم اميرة بممارسة السحر والشعوذة
الضابط: مفيش دليل ضدهم
طارق: انا شوفت أميرة بتتكلم ف التليفون النهارده واكيد كانت بتكلم روڤان
الضابط: احنا ممكن نجيب المكالمات بتاعتهم من شركة الاتصالات عشان نتأكد وساعتها هناخد الاجراءات ضدهم
اياد: تمام
بص الضابط لاياد وقاله: انصحك تغير تهمة أميرة لان القانون عندنا في مصر مش رادع للاعمال دي
اياد بخيبة أمل: عندك حق، جايز في يوم من الايام الدولة تفوق للناس دي وتعمل عقوبة شديدة ليهم
الضابط: ياريت
وامر الضابط باخلاء سبيل معاذ وامر بحبس زياد،وبعد ما خرج طارق واياد ومعاذ من القسم رجعوا عالمستشفى، واعتذر طارق لمعاذ وطلعوا لاوضة قمر اما معاذ طلع لاوضة زوجته واول ما دخلها لقى مفاجأه….
“البارت هيتقسم على مرتين”
نروح للمعسكر عند فارس
بعد ما فارس قفل المكالمة في وش قمر، قعد ينفخ بغضب ويضرب
بقبضة ايده في الحيط عشان يهدأ لحد ما لقى سيف داخل عليه،
فزعق فيه: في ايه؟
سيف بهدوء: يلا عشان الفجر اذن
فارس بامتعاض: طيب
وراحوا يصلوا الفجر وكانت اول مرة فارس يصلي فيها وهو في
الصلاة حس برعشة خفيفه ورهبه، فخلص بسرعة وقام واستنى لما
كل المجموعة خلصوا صلاة وبدأ يتمم على جاهزيتهم فقال سيف: كله تمام يا فندم
فارس: نبدأ على بركة الله
سيف بصوت عالي: يلا يا رجاله عالعربيات
ركب العساكر والضباط العربيات وبدأوا يتحركوا وقدامهم العربية
اللي راكب فيها سيف وفارس وبعد نص ساعة وصلوا المكان
المطلوب وبدأوا ينزلوا من العربيات ويتوزعوا زي ما الخطة
مرسومه وبدأوا يفتشوا البيوت ومجموعة فارس بدأت تتحرك ناحية
بيت محدد فشاور فارس لسيف عالشخص اللي واقف عالسور
فاتحرك سيف وراح ناحيته من وراه وهجم عليه وكسر رقبته واخده على جنب
فقال فارس لمازن بهمس: اتحرك
******************
اتحرك مازن وفارس في ضهرة بيأمنه ووصلوا عند شباك البيت
ونط مازن لداخل البيت وفجأه سمع فارس ضرب نار عليه فنط وراه
واشتبكوا مع العناصر ودخل سيف كسر الباب ووراه مجموعة
عساكر وهم بيضربوا نار لحد ما مسكوا العناصر دي، وقعدهم
فارس قدامه و هما متكتفين وورا كل واحد عسكري بيشيل الماسك
بتاعه وبيرفع راس الشخص اللي ماسكه، وبدأ يمشي قدامهم وهو
بيخلع الخوذه والماسك وبص في وش كل واحد فيهم ووقف قدامهم وسألهم: هو فين؟
رد عليه واحد منهم: تقصد مين؟
فارس: اللي جايين عشانه
نفس الشخص: هرب لانه عارف انك جاي
فارس: يعني خايف مني؟
نفس الشخص باستفزاز: لا عشان يجيب راسك لوحده
ضربه فارس برجله وقعه عالارض وشده من راسه وقاله ببرود مميت: وانا هسيبله ورقة اني مستنيه وهنشوف مين هيجيب راس التاني
وبص للعساكر وقال: خدوهم من هنا
وجروهم عالعربيات وبص لسيف وقال: ابدأوا التمشيط
سيف: تمام يا فندم
فتح الجهاز وبلغ باقي المجموعات انهم يبدأوا التمشيط وخرج وبعد شوية رجع سيف فسأله: ايه الاخبار؟
سيف: تمام يا فندم، مشطنا المنطقة كلها وملوش أثر
فقال فارس وهو بيحط سلاحه في مكانه: في حد اتصاب؟
سيف: مازن واتنين عساكر بس يا فندم
فارس: طيب يلا نرجع
ورجعوا عالمعسكر بالعناصر دي ودخل فارس مكتبه وهو متعصب