نوح : عندي ليكي مفاجأة واعرة ..
قمر بصت له بعصبية وبعدت عينيها عنه ..
كان ناصر واقع علي الارض شاطه نوح برجله بعصبية ..
وبعد وقت صغير دخل واحد من رجالة نوح ومعاه واحد ..
نوح بابتسامة:
اتفضل اعرفكم استاذ ياسر
بصت قمر لبثينة باستغراب…
نوح كمل كلامه: المأذون اللي هايكتب كتابنا انا وانتي يا قمر..
قمر بصت له بصدمة لجمت لسانها…
المأذون فتح الدفتر ..
قمر: انا مش موافقة علي الجواز ده اكده باطل !
نوح اتجمدت ملامح وشه:
اكتب يا عمنا اكتب دا جلع بنات ..
قمر بعصبية:
انت ايييه افهم بقا انا مش عوزاك ..
نوح ببرود:
بس انا عاوزك !
قمر عينيها اتملت بالدموع وحست خلاص ان حياتها انتهت..
قمر بصت ل.نوح: مش مسامحاك يا نوح مش مسامحاك
نوح: هاتسمحيني وهاترجعي تحبيني تاني
قمر: لاه خلاص ده صعب قوي انا قلبي اتقسم نصين يوم ما اتخليت عني واللي بيتكسر صعب يتصلح صعب
قوي ..
كان نوح واقف يسمع لها ..
غمضت عينيها ونزلت دموعها علي خدها بدون توقف لما سمعت ..
(بارك الله لكما وبارك عليكما وجمع بينكما في خير)
نوح: مبروك يا عروسة !
بثينة كانت بتبص لها بدموع وكأنها بتواسيها…
مشي المأذون وقرب نوح من قمر فكها
قمر: خلاص عملت اللي انت رايده من زمان لو مسيت شعره من ناصر او بثينة انا هاموت روحي معاهم